Taiao
Ko te rangi, ko te whenua ko te wai ngā taiao matua torotorohia ana ki te whai mātauranga.
Waiho mā te karakia nei e tohu mai.
Wānangahia te atua o te rangi
O te rā, o te marama, o te whetū, o te kapua, o te hau
Tātaihia ko te kawa o te rangi,
Ko te nui o te rangi, ko te hua o te rangi
Ko te paki o te rangi, ko te pū o te rangi
Ko te mana o te rangi ka tau hā,
Whakatau ko te rangi e tū iho nei
Ka tau hā, whakatau
Ko te whenua e takoto ake nei
Takitakina ko te kawa o Papa
Ko te horanga ā-nuku, he atua!
He tipu te atua, he rākau te atua,
He ngārara te atua, he manu te atua
He oneone te atua e tangi ai te mapu
I te korowai ka takapau he kawa ora!
He orangarangi, he oranganuku
He aroha nā, he kōmanawa
Rurukuhia ki te wai whakaika,
Ko te kawa Tangaroa, he atua!
He mātāpuna, he pukenga wai,
He terenga ika, he paringa tai,
Homai te waiora ki a au
Ki taiao nuku, ki taiao rangi
Ka whakairihia te kawa
Homai te kauhou atua ki uta e!
Ko te takutaku nei he momo whakariterite kia whai whakaaro ki ngā āhuatanga hei kawe i te kaupapa o Mātaiao arā, he whakaraupapa i ngā momo aronga e tutuki ai ngā mahi.