Rauemi

Pohutukawa

Mātauranga: Kei roto i ētahi kōrero mō Tāwhaki i whawhai rāua ko Tama i waho. I taka a Tāwhaki mai i te rangi tuangahuru, ā, i mate. Ko ngā hua whero o te Pohutukawa e pupuri tonu ana ki te toto o Tāwhaki.

Whakapapa:


Akoranga:

“Rukea atu tō kura. Ka nui te kura kei uta  e ngangahu mai nei”. I te taenga atu o Tainui ki waho o Whangaparāoa, e pua ana te pōhutukawa. Nā te pōhēhē o te tāngata ki runga waka, he kura aua pōhutukawa, he rite ki ngā kura i mauria mai i Hawaiki. I rukea ō rātou taonga kura ki te moana. 


i ū te waka ki uta, i kite he pua noa iho i auē ai rātou. Me pupuru tonu ki ōu taonga, kei moumou i te moemoea noa iho.

Pipiwharauroa

Mātauranga: Ka hoki mai tē manu nei i tōna Hawaiiki hei te Mahuru. He toka kei ōna matihao hei mitimiti i a ia e rere ana. Ka tuku āna hēki ki roto i te kōhanga o te riroriro. Na o tātou tipuna te ara haere o te pipiwharauroa i whai i ngā rau tau ki muri. 

Whakapapa: He hononga ki ēnei atua

Akoranga: “Kui kui whiti whiti ora!”- ka āta whakarongo ngā tipuna ki te tangi o te wharauroa. Mehemea ko te kui kui noa iho tana tangi, ka tohu i te tau uaua e whai mai ana. Mehemea ka whai mai te whiti whiti i te kuikui, ka tohua te tau pai. 

Ka tana hokinga mai he tohu mo te whakatō kai. Ko te wā o te Mahuru.

Kōtare

Mātauranga: Ka tū te kōtare ki tōna taunga, pēnei hei kaitiaki mō te pā. Ka āta mātai i tōna āo, kia haramai he kai māna, ka tere ia te kapo atu. Ka whakarite i te toa ki a ia e tiaki ana i tōna pā

Whakapapa: He hononga ki ēnei atua


Akoranga: 

Ripo mai te repo, ka hoki a manu - Ki te kite i te manu e kaha rere ana ki te repo, kei te ora te wai o taua wāhi.

Koura

Mātauranga: Koura o te waitai (koura-punui, koura pawharu, koura-taranga, koura-mapara) Koura o te waimāori (koura-kotua, koura-wai, koura mawhitiwhiti). I hopukia te koura e ngā tipuna ma te tāruke me te ruku. Na Maui te korohe i tāpiri ki te tāruke kia kaha ake te mau o ngā koura. 

Whakapapa: He hononga ki ēnei atua

Rakahore

Hinemurutoka -Tāwhaki

Kama

 Koura


Parawhenuamea

Koura waitai

Tahumaero-Kohurau.

Koura


Akoranga:

He upoko koura - kua rokeroke te roro koura, nā reira he kōrero whakaiti tēnei kianga ki te tangata whakaaro ngoikore. 

He manako te koura i kore ai - he tangata manako nui ki tētahi mea, mahi kore noa kia riro māna taua mea. 

Hue

Mātauranga: Whakatipu ai te hue kia pai ai te tango i te hua hei tahā. I ngā raumati ka kainga ngā hua kāore anō kia pakari. Ka whakatipuria ngā hue ki ngā wāhi hōpuapua, ngā wāhi haukū, ko ngā aka he mea here ki ngā pou. I whakamahia te hue hei ipu mō te wai, te kai, ngā manu huahua, te taonga pūoro, hei hopu reo me ngā waiata hoki. He tino taonga ki ō tātau tīpuna!

Whakapapa: He hononga ki ēnei atua

Tane = Hinerauāmoa

Pūtehue


Akoranga: ‘Ka rere te hue mataati’

Ko ngā kāwai hue he huahuatau mō ngā kāwai whakapapa. He whakataukī tēnei hei akiaki i te tāngata, inā timata ai he mahi me noho māro ki te kaupapa kia tutuki noa ngā whāinga.

 

‘He tamariki wāwāhi tahā’

Koinei ngā tamariki haututu e whati ana i ngā ture, e peke ana i ngā taiapa. Engari he painga anō ki roto i ēnei tamariki e whakaaro auaha ana, ngā Maui o inaianei!

Tutu

Mātauranga: Ko te tutu tētahi rākau tino paitini. Ahakoa te ātaahua o ōna hua, me tūpato te tāngata. He tino tāoke ngā hua. He maha ōna whakamahia engari me āta whakariterite.

‘Me te whata raparapa tuna e iri mai ana te tutu’

E whakarite ana i ngā hua o te tutu ki ngā tuna kua pāwharangia, ā, e iri ana.

Whakapapa: He hononga ki ēnei atua

Hine māhanga

Ngā manu ririki


Akoranga:

 ‘Ki te inumia weratia te tutu, ka rore’

He tūpatotanga nō ngā tipuna tēnei whakataukī. Āta whakaarohia te putanga i mua i te mahi ahakoa te mahi. Kia tika hoki ōu tukanga i mua i te mahi.

Kawakawa

Mātauranga: He maha ngā rākau ka nanao e te Māori hei rongoā. Ko te tākai kawakawa, ko te pia ngaungau mō te niho mamae. Kei tēnā, kei tēnā o ngā wāhanga o te kawakawa he mana rongoā. I ahu mai te ingoa kawakawa i Hawaiki. Hanga rite te kawakawa ki te kava o ngā moutere o Te Moananui-a-Kiwa.

Whakapapa: He hononga ki ēnei atua

Ranginui

Papatūānuku

Io

Aitu-pawa

Tānemahuta


Akoranga: 

Mōhio whānui ai tātou he tohu te rau kawakawa mō te kirimate. Engari he ora anō i roto i te rau mō te hunga ora kaua e waiho noa iho ko te mate te tohu hei whakamahi, maranga mai he ora. Whāia!

Tōtara

Mātauranga: I ngā rā o nehe, matomato te tipu o te tōtara, ā, kāore e pērā ana i ēnei rā. I te wehenga o Ranginui rāua ko Papatūānuku ka whakatūria ētahi o ngā tamariki a Tāne hei pou tokotoko-o-te-rangi. Ko Tōtara, ko Kauri, Ko Rimu, Ko Kahikatea me ētahi atu.

Whakapapa: He hononga ki ēnei atua


Akoranga: 

‘Ka haere te tōtara haemata, ka takoto te pukatea wai nui’

Ko te tōtara haemata he tōtara pakari e tupu ana. He kupu whakarite tēnei mō te rangatira,

E whakarite ana te pukatea ki te mātāpuputu. Ko te pukatea he rākau taumaha e tipu ana kei ngā repo. Ka tau noa te kaumātua ki te kāinga, he iti tōna hāereere.

Tawa

Mātauranga: Ko te kirirākau he rongoā mo ngā raru o te puku me te rewharewha. He kai te hua ki ngā tipuna. He reka te kiko o te hua, te pokerehū. He kānga papā te kano. Ko te tao manu i hangaia ki ōna peka.

Whakapapa: He hononga ki ēnei atua


Akoranga: 

He tawa uho ki te riri’. He tino māro te uho (kano) o te tawa. Ka whakatairite atu ki tētahi tangata mārō ki āna kaupapa, ki āna whakapono, ki te toa hoki. Me mārō koe perā i te uho tawa.

“He tawa parā, he whati kau tāna’ - he kiko mohe kei te hua tawa. He kupu whakarite mo te tangata toupiore.

Kowhai

Mātauranga: Kia puāwai mai te kōwhai, kua tata mai te wā o te kōanga. Ka tohu i te huringa o te kaupeka, ā, te whakahoutanga o te ao i a ia anō mai i te hōtoke. Mō ētahi rohe, iwi, e tohu nei te kōwhai i te mōmonatanga o te kina, ā, kua rite kia kohia. Tōna rite ki te puāwaitanga mai o te pōhutukawa ki ētahi wāhi, o ngā pua kāuka ki ētahi atu wāhi hoki.

Whakapapa: He hononga ki ēnei atua


Akoranga: 

He ua kōwhai - te puāwaitanga mai o te kōwhai, he marangai tōna rite e tohu nei i te koanga. Kei te mahana haere te ao.

karaka

Mātauranga: He rākau teitei te rākau karaka. Ka puāwai mai ōna putiputi mai i te hōtoke ki te koanga, he kākāriki, he kowhai hoki ngā tae. Hei te raumati puta mai ai ngā hua, he karaka te tae. I whakamahia e ngā tīpuna hei kai, hei rongoā hoki. Engari he TAOKE te kākano ina kāore e tika te whakarite! He kai hoki mā te kereru, te paihamu me te aitanga a pēpeke. I hangaia ngā hoe ki te rākau karaka i te wā a o tātou tīpuna.

Whakapapa: He hononga ki ēnei atua


Akoranga: 

‘Te karaka whakaura i te waru’

Te Waru o Rehua, koinei te marama e reri ana ngā hua karaka!


‘Ko te kaha i te toki

Ko te uaua i te pakake

Ko te pakari i te karaka’

He whakataukī tēnei e kōrero ana mo te āhua o te tangata e tū pakari ana pērā i te rākau karaka.

Karoro

Mātauranga: E hono ana a Karoro ki ngā mātauranga o te rangi, arā, i a whetū (Rehua), i ngā hau anō a Tāwhirimātea. I whakamahia ngā nekehanga waeawae a te Karoro e ngā toa a Tū hei toroparawae, hei whakangūngū mā te toa. He wāhanga hoki nōna ki a Māui i te hītanga ake i tōna ika nui. Ko Tahuna Tapu te wāhi tuatahi i tau ai ngā manu tātahi.

Whakapapa: He hononga ki ēnei atua


Akoranga: 

‘He karoro inu tai’

Ko te tangata noho ki te taha moana, e kaha hoki atu ki te moana rānei, e kīia ai he karoro inu tai.

‘Mā te Karoro o te moana’

E hokahoka ana a Karoro ki te rangi, ki runga i te wai, he ātaahua pērā i a Hina. E whakatairite ana ngā parirau o te karoro ki te kape o te marama.

Kāhu

Mātauranga: He kaituku karere nō te rangi. He kāhu, he kōrako, he kērangi āna ingoa. Ka papaki ngā parirau, ka rewa, ka rōnaki, ka papaki anō. Kua āhua whero te tae na te whiu o te ahi o Mahuika ki a Maui.

Whakapapa: He hononga ki ēnei atua


Akoranga: 

Kāhu kōrako - he rangatira. Kua pakeke. Kua mōhio. Kanohi kāhu - he tangata koi te whatu. He manu āta titiro, āta mahi i āna mahi te kāhu.

Kōtuku

Mātauranga: Ki te whakarite i te tangata ki te kōtuku, kei te whakanui i a ia ki tētahi taumata whakahirahira. He tohu whakahirahira tonu te kitenga atu i te manu kōtuku e rere ana.

Whakapapa: He hononga ki ēnei atua


Akoranga: 

Ka kiia e uaua nei te kite i te kōtuku e rere ana. Ka mea “he kōtuku rerenga tahi”. Ka whakahāngai atu ki tētahi tangata whakahirahira e kore e tino kitea.

Pihereina

Mātauranga: Te Waru o Rehua - kua tae tātau ki te wā o Rehua. Ko te pihareina, te kihikihi ētahi o ngā manu a Rehua, e kaha ana ki te kitā i tēnei wā. Ka tuku waiata te mea tāne hei whakamanea i te uwha. Ki te tō i te tangi a te pihareina ka rite ki te puoro tautini.

Whakapapa: He hononga ki ēnei atua


Akoranga: 

‘Te tatarakihi, te pihareina; ko ngā manu ēnā o Rehua’

‘Tangi e te pihareina, tohu o te raumati’

Koinei ko te waru i kataina e Rehua. Ko te pikinga ake o te whetū a Rehua ki te rangi, ko te hia wai o te whenua, e meinga ana koia ko te pakakā o te whenua, ko Rehua tonu e kata ana! Ko ngā manu a Rehua e waiata ana!