Tāngata
Tāngata
"He uri au nō ō tātou atua. He pōtiki hoki au nō te taiao."
Embedded Files
Wayne Ngata - Ngāti Ira.
He uri mātau ko ōku karangatanga nō ngā taiao o te Tairāwhiti, nō ngā parapara hoki o ō mātau mātua tīpuna. He kaiārahi au i ngā takatakahanga taiao e mākū anō ai te kiri i te pia o te rākau, i te huka o te maunga, i te ua o te rangi, i te mana o te moana.
Basil Morgan Jnr - Ngāti Kati.
He uri au nō Te Tairāwhiti whānui. Kua 20 tau i ngā kura rūmaki reo (kura tuatahi, wharekura, whare wānanga), hei kaiako, hei kaiārahi, hei kaitiaki. E manawanui ana au ki te āwhina i te tangata kia eke ki ōna taumata, kia whāia hoki te mānako o te ngākau, te ara tūturu o tōna pītau ira. Mauri tū, mauri tau, mauri ora!
Te Aroha Paenga - He uri nō Ngāti Porou, Ngāti Konohi, Ngāti Rangi.
Kua 12 tau i ngā kura rūmaki reo me ngā kura auraki. Kua noho hoki hei kaimahi whakawhanake i ngā kaupapa Māori mō Ngāti Konohi, mō ngā iwi o Tūranganui-a-Kiwa. Waimarie ahau i te noho ki raro i ngā parirau o Mātaiao. Ka aroha atu ki ngā āhuatanga katoa, te whai atu i ngā mātauranga māori, te mātai atu i ngā momo taiao. Mātua te whakatakoto huarahi e whai oranga ai te Māori i ōna taiao.
Melissa Mackey-Huriwai - Nō Ngāti Porou me Te Whakatōhea.
Kua whakaako ahau ki te kura o Manutuke mo ngā tau 14 kua pahure. He kaiwhakahaere hākinakina ahau ki Tūranga, e ngana ana ki te akiaki i te tangata ki te whakapau kaha i ā rātou mahi kātoa ahakoa te aha. E ngakaunui ana ahau ki tēnei kaupapa a Mātaiao, te hoki atu ki ngā mātauranga taiao, Māori anō, te whakaora i ngā kōrero atua. He oranga tinana, he oranga ngākau, he oranga wairua.
Waimarie āku tamariki, āku iramutu i tēnei kaupapa kua whāwhātia, kua rangona e rātou hei tuitui ki tō rātou ao hurihuri hei tikitiki mō ō rātou māhunga.
Kiwi Campbell - Ngāi Tūhoe, Te Whānau a Apanui, Ngāti Porou.
He kaiako, he kaiārahi, he kaituitui, he kaiwhakahaere kaupapa i te kuratini o te Tairāwhiti (EIT) mō ngā tau 16. He toki anō ki te hoe waka ama, ki te whakaako hoki, i te motu, i te ao. Mātua te whakatakoto huarahi e whai oranga ai te Māori i ōna taiao.
Kimiora Atkins - Ngāti Porou whānui.
Nō te mutunga o te tau 2019 i oti taku tohu kaiako. I mua noa, he kaiawhina ki ētahi o ngā kura kaupapa Māori o Te Tairawhiti. He tangata kaitiaki taiao ahau. E aroha nui ana ki te taiao, nā reira ko tōku aronga ki a ia me te iwi Māori. He honore nui nāku te noho tahi ki te taha o te whānau a Mātaiao, kia taea ai te kimi huarahi hei tūhono anō te Māori ki tōna taiao.
Terina Te Karu - Nō Muaūpoko, Rangitāne, Kahungunu.
Kua 15 tau i ngā kura Aho Matua, Kura-ā-iwi, kura Mana Motuhake hei kaiāwhina hei kaiārahi, hei ringa toi. Aroha ana ki te rongo atu i ngā tamariki e hīkaka ana ki te ako. Me poipoi i te ākonga kia puāwai ai tōna tipu. Ka nanao atu ki ngā kōrero a tuaukiuki, ki a pēperekōu mā, ki ngā taonga tuku iho hei ārahi i a tātou. Tūhuratia, wānangatia, manakohia.
Te Rauhuia Kutia - Ngata - Te Aitanga a Hauiti, Ngāti Ira, Ngāti Porou, Ngāti Konohi.
Mōrena. He tama piki maunga tēnei. Katoa katoa ngā akoranga tērā mai i te taiao, he mea e taea ai te whakamahi atu ki rō akomanga o ngā kura. He kaihāpai noa tēnei i ngā kaiako kura ki te whai huarahi tērā e whai wāhi ai te kura taiao ki rō aua akomanga. Me ko te reanga e whai ake nei, kei a rātou tonu te mana o āpōpō. Ina he akoranga tā ngā mahi nei hei hāpai i te tangata, i te tauira e whai hua ai te oranga o te taiao, kua tutuki te wāhanga ki au.
Page updated
Google Sites
Report abuse